«Nova Imperium» komandasına volontyorlar qabıl etiwdiń 2-basqısı tabıslı juwmaqlandı!
Nókis qalası 1-sanlı texnikumınıń jarqın hám aktiv jasların óz ishine alǵan «Nova Imperium» komandası jańa oqıw jılında óz qatarın keńeytiw boyınsha nıq qádemlerdi basladı. Búgin belsendi jaslar arasında úlken qızıǵıwshılıq oyatqan qabıllaw processiniń ekinshi basqıshı juwmaqlanıp, tiyisli nátiyjeler rásmiy túrde járiyalandı.
1-kurs oqıwshıları arasında ótkerilgen bul tańlaw jaslarǵa ózleriniń liderlik qábiletlerin, shıǵarmashılıq oy-pikirlerin hám komandada islew kónlikpelerin kórsetiw ushın úlken múmkinshilik boldı. Qabıl etiwdiń birinshi basqıshınan sátli ótken úmitkerler ekinshi basqıshqa jiberilip, onda ózleriniń intellektual hám shólkemlestiriwshilik múmkinshiliklerin túrli tapsırmalar arqalı sınap kórdi.
Komanda wákilleriniń atap ótiwinshe, barlıq qatnasıwshılardıń jigeri hám jańa ideyalarǵa umtılıwı óte joqarı bahalandı. Nátiyjede, básekili hám ashıq túrde ótken tańlaw juwmaǵı boyınsha eń múnasip dep tabılǵan talabanlar «Nova Imperium» komandasınıń jańa aǵzaları qatarına qabıl etildi.
Tańlawdan sátli ótken barlıq jas volontyorlarımızdı shın júrekten qutlıqlaymız! Aldımızda komanda menen birge ámelge asırıwımız kerek bolǵan qiziqlı joybarlar, iri ilajlar hám úlken jeńisler kútpekte. Jaslar awqamı hám texnikumımız atınan barlıq jańa aǵzalarǵa úlken tabıslar tilep qalamız!
Jańa quramdaǵı «Nova Imperium» komandası menen birgelikte alǵa — jańa marralar sari!
«Nova Imperium» baspasóz xızmeti.

Русский
English
Uzbek