Mámleketimizde professional bilimlendiriw sisteması reformalanbaqta. Jaslardı zamanagóy kásip-ónerge oqıtıw, ishki hám xalıqaralıq miynet bazarında básekige shıdamlı qánigeler tayarlawǵa ayrıqsha itibar qaratılmaqta.
Mámleketimiz basshısınıń usı jıl 17-iyuldegi “Respublikada xalıqaralıq bilimlendiriw standartları tiykarında orta arnawlı, professional hám joqarı bilimlendiriw baǵdarlamaların engiziwge baylanıslı qosımsha ilajlar haqqında”ǵı qararına muwapıq, texnikumda Britaniyanıń Pearson BTEC xalıqaralıq bilimlendiriw baǵdarlaması engizildi.
Dúnyanıń 70 mámleketinde qollanılıp atırǵan bul baǵdarlama Ózbekstanda birinshi márte usı texnikumda engizildi. Onıń tiykarǵı ózgesheligi – teoriyalıq bilimlerdi ámeliy kónlikpeler menen birlestiriw. Bunıń ushın bilimlendiriw standartlarına say zamanagóy oqıw ustaxanaları, sanlı laboratoriyalar shólkemlestirilgen.
Joybardıń ulıwma bahası 11,9 milliard sum bolıp, sonnan 2 milliard sumı birge islesiwshiler tárepinen ajıratılǵan. Nátiyjede 240 orınlıq zamanagóy ustaxanalar shólkemlestirildi. Texnikumda jámi 1 203 oqıwshı bilim almaqta.
Mákeme 4 gektar maydanda jaylasqan. Imarat hám obektlerdiń ulıwma maydanı 4,6 mıń kvadrat metr. Bul jerde region ekonomikasınıń jetekshi tarmaqları ushın qánigeler tayarlaw boyınsha dual oqıtıwdı engiziw názerde tutılǵan. Xalıqaralıq baǵdarlama pitkeriwshileri 70 ten aslam mámlekette tán alınatuǵın diplomǵa ie boladı.
Jeke menshik sherik Salovutdin Ilyosovtıń qatnasıwında “spin-off” bilimlendiriw baǵdarlaması da jolǵa qoyıldı. Onıń sheńberinde 136 oqıwshı talap joqarı bolǵan zamanagóy kásip-ónerlerdi ielemekte. Tiykarǵı pánler inglis tilinde oqıtılıp, oqıw-metodikalıq qurallar da usı tilde berilmekte. Bul kásiplik bilim hám qánigelik boyınsha jumıs islew ushın zárúr bolǵan til biliw kónlikpeleriniń rawajlanıwına xızmet etedi.
Ámeliy tayarlıq sebepli pitkeriwshilerdiń sırt elde jumısqa jaylasıw imkaniyatları keńeymekte. Bıyılǵı jılı texnikumda paydalanıwǵa oqıǵan 25 jumıssız puqara Estoniyaǵa jumısqa jiberildi. Olardıń aylıq miynet haqısı 3 mıń evroǵa shekem.
Bunnan tısqarı, texnikumda shólkemlestiriletuǵın 40 million dollarlıq sanaat zonası ushın zárúr qánigeler tayarlaw boyınsha kelisimlerge erisildi. Bul bilimlendiriwdiń óndiris penen baylanısın bekkemlew, pitkeriwshilerdiń bántligin támiyinlew imkaniyatın beredi.
Mámleketimiz basshısı texnikumda jaratılǵan sharayatlardı kózden ótkerdi. Xalıqaralıq miynet bazarında maman kadrlarǵa talap artıp baratırǵanı atap ótildi. Oqıw procesin jumıs beriwshilerdiń talabınan kelip shıǵıp shólkemlestiriw boyınsha kórsetpeler berildi.

Русский
English
Uzbek





